N'on ket marv c'hoazh

N'ont ket marv c'hoazh.

Chomet on mut moarvat, pellig a-walc'h, ha n'ouzon ket c'hoazh ma vo hizivaet alies ar blog-mañ evit poent.

Da lâret eo n'em eus ket divizet c'hoazh ma vo serret da vat anezhañ.

O prederiañ emaon.

Trement buan a ra an amzer, ha bemdez e soñjan 'ba kement tra n'em eus ket graet daoust din c'hoant mont war-raok war tachenn-mañ-tachenn.

Kenderc'hel gant ar blog-mañ neuze ?

Perak pas. Perak ?

Chomet on ket dipitet hag inervet hag a-raok.

Danvez a-walc'h a zo evit skrivañ diehan war pep tra moarvat.

Ur bed troet sot da vat, kamaladed ha n'int ket 'benn ar fin, ur santimant emaomp o vont war zu kudennoù divent er bloavezhioù o tont. Anken ha tra ken mitu ?

Anzavit, n'eus ket peadra da laouennat.

Gouennelouriezh o kreskiñ evel ur respont d'ar c'hudennoù ekonomikel, ha netra evit enebiñ outo... pe dinerzh ar respont.

Emañ an tu kleiz m'eus aon, o koll e ene ivez, a-raok koll muioc'h marteze.

Diouzh ma zu, n'em eus ket kalz a respontoù, ken heuget ma'z on a wechoù gant tud a zo sañset stourm em c'hichenn, eus memes tu eus ar vardell.

Ne chomo din 'met ur spered-ki disesper evit magañ ma soñjoù du m'eus aon... pe kejañ gant tud gwellwelus meurbed a c'hellfe frealziñ ac'hanon un tammig.